Inama y’abakuru b’ibihugu byo mu miryango ya EAC na SADC yashyizeho abahuza bashya mu rwego rwo gushishikariza impande bireba kugira ubushake mu gukemura ikibazo cy’umutekano mucye mu Burasirazuba bwa Repubulika Iharanira Demokarasi ya Kongo (RDC). Abo bahuza ni Catherine Samba Panza wayoboye Santarafurika, Kgalema Motlanthe wabaye Perezida wa Afurika y’Epfo, na Sahle-Work Zewde wabaye Perezida wa Ethiopia. Aba biyongereye kuri Uhuru Kenyatta wabaye Perezida wa Kenya na Olusegun Obasanjo wayoboye Nigeria, bari basanzwe mu buhuza.
Abasesengura politiki yo mu karere basanga izi mpinduka zongerera icyizere inzira y’ibiganiro, cyane ko bamwe mu bahuza bashya basobanukiwe umuzi w’ikibazo. Icyakora, basanga icy’ingenzi ari ubushake bwa politiki ku mpande bireba kugira ngo umuti urambye uboneke.
Ubufatanye bw’aba bahuza bwasize hagaragaye impinduka, aho Igihugu cya Qatar cyinjiriye mu nzira z’ubuhuza. Nyuma y’inama yabereye i Doha, hatangiye kugaragara impinduka nk’ihinduka ry’imvugo ya Kongo ku biganiro n’umutwe w’AFC/M23, wari warakomeje kwangwa n’iyo Leta.
Maitre Gasominari Jean Baptiste na Tombola Gustave bagaragaje ko ubufatanye bw’abahuza bushobora kugira uruhare runini mu kugena inzira y’ibiganiro. Minisitiri w’Ububanyi n’Amahanga n’Ubutwererane w’u Rwanda, Amb. Olivier Nduhungirehe, nawe yagaragaje ko icyizere cyagaragaye gikwiriye kujyana n’ubushake bwa politiki bwa Guverinoma ya Kongo.
Icyakora, ibimenyetso bishingiye ku mikoranire y’u Bubiligi na Leta ya Kongo mu bya gisirikare byateye impungenge abasesenguzi, kuko ibi bishobora kudindiza ibiganiro by’amahoro.
Perezida Paul Kagame, ubwo yari muri iyi nama, yashimangiye ko u Rwanda rukomeje gushyira imbere umutekano warwo. Yavuze ko ikibazo cy’umutekano mucye mu Burasirazuba bwa Kongo kizakemuka ari uko impamvu zikigize ziranduwe, cyane cyane iziri mu bihugu birukikije, birimo na Kongo ubwayo.
