Kompanyi y’indege yo muri Kanada, Air Canada, yatangaje ko imaze kugera ku masezerano y’igihe gito n’ishyirahamwe ry’abakozi bayo bagera ku bihumbi 10 bashinzwe kwakira abagenzi mu ndege (flight attendants), mu rwego rwo gukumira imyigaragambyo yari kuba ifite ingaruka zikomeye ku ngendo mpuzamahanga.
Ayo masezerano y’agateganyo yagezweho nyuma y’uko abakozi binubiraga imishahara n’imibereho yabo mu kazi, ibintu byari bimaze igihe kirekire biganirwaho hagati y’impande zombi. Air Canada yatangaje ko ibi biganiro byarangiye neza kandi bigahesha icyizere cyo gukomeza gutanga serivisi zayo ku buryo budahungabanya abakiriya.
Umuryango w’abakozi Canadian Union of Public Employees (CUPE), uhagarariye aba bakozi, wavuze ko uzakomeza kwiga kuri ayo masezerano mbere yo kuyemeza burundu, ariko ko ari intambwe ikomeye mu gukemura ibibazo byari bimaze iminsi byazamuye impungenge mu ngendo z’indege.
Air Canada ni imwe mu makompanyi akomeye ku isi mu rwego rw’ingendo z’indege, itwara abagenzi babarirwa muri za miriyoni buri mwaka. Kuba ayo masezerano amaze kugerwaho bituma ibikorwa by’indege bikomeza nta nkomyi, mu gihe imyigaragambyo yari kuba yatumye haba akajagari ku ngendo mpuzamahanga, cyane cyane mu bihe by’impeshyi aho abagenzi baba benshi.
