Luke Harding, umunyamakuru w’igitangazamakuru The Guardian ukorera mu mahanga, aratangaza ko itangazwa ry’amasezerano y’amahoro mu ntambara iri hagati ya Ukraine n’Uburusiya ryazanye impagarara mu rwego mpuzamahanga. Ibi bivugwa mu gihe hari amakuru avuga ko Leta Zunze Ubumwe za Amerika ishobora kwitegura kwemera ko Uburusiya bugenzura intara ya Crimea, ibintu byafatwa nk’impinduka ikomeye mu miyoborere ya Amerika ku ruhando mpuzamahanga.
Nk’uko byatangajwe na Bloomberg, hari amakuru y’uko abayobozi ba Amerika bashobora gutanga intsinzi ikomeye kuri Perezida w’Uburusiya Vladimir Putin, bemera ko Crimea ari iy’Uburusiya. Iyo ntara yafashwe n’ingabo zidasanzwe z’Uburusiya mu 2014, hanyuma Putin ayishyira ku ruhande rw’igihugu cye binyuze mu matora yamaganwe na benshi nk’iy’amahimbano.
Niba Amerika yemeye ko Crimea ari iy’Uburusiya, byaba binyuranyije n’amategeko agenga Umuryango w’Abibumbye (UN Charter), ndetse bikica amasezerano yashyizweho nyuma y’intambara ya kabiri y’isi avuga ko nta gihugu gifite uburenganzira bwo kwigarurira ubutaka cyoresheje intambara. Ibihugu byinshi bikomeye ku isi, birimo n’u Bwongereza, byanze kwemera ko Crimea yafashwe mu buryo bwemewe n’amategeko.
Iri yemezo rishobora guteza uburakari bukomeye, cyane cyane mu Bufatanye bw’u Burayi n’igihugu cya Ukraine. Ababirwanya bavuga ko kwemera uburiganya nk’ubu ari ugushyigikira urugomo, ndetse bikaba byateza akaga mu buryo bushobora no gutuma amahoro y’isi yose asubira inyuma.
Izi mpaka zije mu gihe Donald Trump wahoze ari Perezida wa Amerika yagaragaje ko igihugu cye gishobora “kwiyakira” no kudakomeza gushakisha amasezerano y’amahoro niba bitagezweho vuba. Ibi bikaba bisa n’aho ari ubutumwa buhumira ku mirari ku gihugu cya Ukraine.
Inama zigamije kuganira ku mahoro ziteganyijwe gukomereza i Londres muri iki cyumweru. Hari amakuru yavuye mu bantu bari hafi y’iyo mishyikirano avuga ko Leta ya Amerika ishaka gukurura amasezerano yoroheye Uburusiya. Ibyo byatuma Uburusiya rwemererwa kuguma mu bice yafashe mu majyepfo no mu burasirazuba bwa Ukraine, harimo na Crimea.
Ikindi cyatangajwe n’ikinyamakuru New York Post ni uko Amerika ishobora no gusuzuma gukuraho ibihano yafatiye Uburusiya ndetse no gutanga izindi nyungu (zizwi nka “carrots”) mu rwego rwo kurushaho gushyigikira ayo masezerano. Ku rundi ruhande, Donald Trump we yakomeje gushyira igitutu kuri Ukraine, arayihagarikira ubufasha bwa gisirikare, anasaba ko Leta Zunze Ubumwe za Amerika yahabwa imigabane ku mutungo kamere ukize w’icyo gihugu.
