Beirut, tariki ya 7 Kanama 2025 – Guverinoma ya Libani yongeye guterana kuri uyu wa Gatatu iganira ku cyemezo kirimo gushyirwaho igitutu n’Amerika, iyisaba ko umutwe wa Hezbollah wamburwa intwaro bitarenze impera z’uyu mwaka.
Ibi biganiro bikomeje kuba mu gihe Leta Zunze Ubumwe za Amerika zishyira igitutu kuri Libani ngo ishyire intwaro zose mu maboko y’igisirikare cy’igihugu, nk’uko bivugwa n’ibinyamakuru mpuzamahanga birimo Reuters na Al Jazeera.
Mu gihe inama Yabaga, bamwe mu bagize guverinoma bahagarariye amashyaka ya Hezbollah na Amal (yiganjemo aba Shi’ite) bahise basohoka mu cyumba cy’inama, bavuga ko icyo cyemezo gishyirwaho igitutu n’Amerika n’Israheli, kandi ko batazemera kukigiraho ibiganiro.
Nubwo abo baminisitiri bigumuye, abandi bayobozi basigaye bakomeje inama ndetse bemeza ko igisirikare cya Libani cyatangira gutegura gahunda yo kwambura intwaro imitwe yose itari iya Leta, harimo na Hezbollah.
Gahunda Yatanzwe n’Amerika: Kwambura Intwaro, Kuvana Abasirikari ba Israheli, n’Inama Mpuzamahanga y’Ubukungu
Gahunda ya Leta Zunze Ubumwe za Amerika igizwe n’ibice bine:
- Kwambura intwaro imitwe yitwaje intwaro (harimo Hezbollah),
- Kuvana ingabo za Israheli ku butaka bwa Libani,
- Gusubiza abari barafashwe bunyago hagati y’impande zombi,
- Gutegura inama mpuzamahanga izafasha mu kuzahura ubukungu bwa Libani, ifatanyije n’ibihugu nka U Bufaransa, Arabia Sawudite, na Qatar.
Impuguke mu bya politiki zihanura ko kwambura intwaro Hezbollah ku ngufu bishobora gutera imvururu cyangwa intambara y’imbere mu gihugu. Umuyobozi wa Hezbollah, Sheikh Naim Qassem, yavuze ko bazirwanaho mu gihe bagabwaho igitero, kandi ko nibaramuka baraswaho, bazasubiza Israheli barasa n’ibisasu bya rutura.
Iki cyemezo kiri gushyirwaho igitutu na Amerika kiri mu mayira abiri: gukomeza gushyira imbere ubushake bwa Leta mpuzamahanga, cyangwa kwanga gusubiza hasi intwaro bikaba intandaro y’indi ntambara. Ibi bikaba bishyira igihugu mu bibazo bikomeye byo guhitamo hagati y’umutekano w’imbere mu gihugu n’imibanire n’amahanga.
