Inkongi yibasiye ishuri rya GS Runyombyi: Aho byahereye n’uburyo abanyeshuri bafashijwe

Ku wa Gatandatu, tariki ya 7 Ukuboza 2024, inkongi y’umuriro yibasiye ishuri GS Runyombyi riherereye mu Karere ka Nyaruguru, yibasira dortoir iraramo abakobwa. Umuriro watangiye ahagana saa moya na 45 z’ijoro (19h45), abanyeshuri bavuye gusubiramo amasomo bitegura gufata ifunguro rya nimugoroba.

Umuturage witwa Cynthia Kanyana wari mu cyumba aho inkongi yatangiriye, yatangaje ko yumvise ibintu biturika maze akabona umuriro watangiye kwaka. Abanyeshuri bahise biruka basohora bagenzi babo barwaye cyangwa baryamye, ariko dortoir yose n’ibiyirimo birakongoka, harimo ibitanda, imifariso, n’ibikoresho by’abanyeshuri.

Iperereza ry’ibanze ryerekanye ko inkongi ishobora kuba yaratewe n’insinga z’amashanyarazi zashaje, cyane ko umuriro wari waherukaga kubura kabiri mbere y’uko iyi mpanuka iba. Umuyobozi w’Akarere ka Nyaruguru, Dr Emmanuel Murwanashyaka, yavuze ko inyubako z’iri shuri zisakaje amabati ya asbestos, ndetse zubatswe mu 1966, zimwe zikaba zarashaje cyane. Biteganyijwe ko hazasanwa inyubako zashenywe n’inkongi ndetse hakajyanwa insinga nshya z’amashanyarazi mu mashuri asigaye.

Nyuma y’inkongi, ubuyobozi bw’igihugu bwihutiye gufasha abanyeshuri bagizweho ingaruka n’iyo nkongi. Babashyikirijwe ibikoresho birimo amakaye, amakaramu, imifariso, amashuka, ibitenge, inkweto zo kwigana, ibikoresho by’isuku nka sabune, imiti y’amenyo, n’uburoso. Abanyeshuri bagaragarije ibyishimo byo gushyigikirwa n’ubuyobozi, aho umwe muri bo yagize ati: “Nshimiye Leta yacu y’u Rwanda. Yagize neza, kandi iduhaye ibyadufashije.”

Nubwo ibi bikoresho byatanze ihumure ku banyeshuri, bagaragaje impungenge ku bikapu byo gutwaramo udukoresho dushya baheruka gushyikirizwa, basaba ko babifashwamo.

Ku munsi ukurikira inkongi, abayobozi batangaje ko hari gahunda yo gusana dortoir yahiriye no kongera gusakara izindi nyubako zashaje mu rwego rwo kurinda ko impanuka nk’iyi yazongera kubaho. Ishuri GS Runyombyi ryigamo abanyeshuri 467, barimo abakobwa 258 na bahungu 209. Dortoir yahiye ni imwe muri esheshatu ziraramo abakobwa, zikaba ari zo zigiye gushyirwamo ingufu mu gusubizaho umutekano n’imiterere ijyanye n’igihe.