Tehran, Iran — Leta ya Iran yatangaje ko yabashije kubona amabanga y’ubumenyi buhambaye ya porogaramu ya nikleyeri ya Israel, ariko ntiyatangaje ibimenyetso bifatika bishimangira ibyo birego.
Ibi byatangajwe n’umuyobozi wa serivisi z’ubutasi muri Iran, Esmail Khatib, wavuze ko igihugu cye cyabonye “inyandiko z’uburemere bukomeye” zerekeranye n’ubushakashatsi n’umutekano wa Israel, harimo n’ibijyanye n’imikoranire yayo n’ibindi bihugu byo mu Burengerazuba.
“Ni ubuhamya butomoye bw’uko Iran ifite ubushobozi bwo kugera ku mabanga akomeye ya Israel n’abafatanyabikorwa bayo,” Khatib yatangaje abinyujije kuri televiziyo ya Leta.
Gusa, Khatib ntiyigeze asobanura uburyo izo nyandiko zabonetse, aho zakuwe cyangwa uburyo zakoreshejwe, ibintu byateje impaka ndende mu bitangazamakuru mpuzamahanga.
Umuyobozi Mukuru w’Ikigo Mpuzamahanga Gishinzwe Kugenzura Ikoreshwa rya Nikleyeri (IAEA), Rafael Grossi, yavuze ko ayo makuru Iran ivuga ko ifite “asa n’arebana” n’Ikigo cy’Ubushakashatsi cya Soreq kiri muri Israel, ariko atari ibijyanye n’ikigo cya Dimona, aho hakekwaho gucumbikira ibitwaro bya nikleyeri.
Grossi yemeje ko IAEA igiye kugenzura ibyo birego, nubwo kugeza ubu nta bimenyetso bihari byemeza koko ko ayo mabanga yabonetse.
Iri tangazo rije mu gihe hakomeje umuvundo wa dipolomasi ku rwego mpuzamahanga, aho ibihugu by’i Burayi na Leta Zunze Ubumwe za Amerika bishaka ko Iran isubizwa ibihano mpuzamahanga kubera kutubahiriza amasezerano ya nikleyeri.
Kuva Iran yatangira gukemanga amasezerano ya 2015 yerekeye gukumira ikoreshwa ry’ingufu za kirimbuzi, impungenge zarushijeho kwiyongera. Ubu harimo gutekerezwa gusesa burundu amasezerano yahozemo Iran n’ibihugu bikomeye by’i Burayi, U Bushinwa, U Burusiya n’Amerika.
Ubusubiracyaha cyangwa ubwirasi bwa dipolomasi?
Abasesenguzi bamwe bavuga ko iri tangazo rya Iran rishobora kuba ari igikorwa cya politiki kigamije gushyira igitutu ku muryango mpuzamahanga, cyane cyane mbere y’inama y’inteko rusange ya IAEA iteganyijwe mu cyumweru gitaha, aho Iran ishobora kongera kugaragara nk’igihugu kitagengwa n’amasezerano mpuzamahanga.
Nubwo Iran yemeza ko ifite ayo mabanga, bamwe mu batavuga rumwe na Leta baribaza niba hataba hari ikindi kiri inyuma, birimo no kugerageza kwerekana ubushobozi bw’ubutasi bwayo nyuma y’imyaka ishize Mossad ya Israel ivumbuye inyandiko nyinshi z’ubushakashatsi bwa Iran mu 2018.
Kugeza ubu, Iran ntiratanga ibimenyetso byemeza ko koko yakuye ayo mabanga muri Israel, ibintu bikomeza gukurura impaka hagati y’impande zombi. Ku rundi ruhande, abashinzwe umutekano ku isi bamaganye iyi myitwarire nk’ishobora guteza umutekano muke mu karere no ku rwego rw’isi.
