Kompanyi ya Microsoft yongeye kwirukana abandi bakozi babiri bari mu myigaragambyo iherutse kubera mu biro byayo bikuru, aho bari barwanya amasezerano sosiyete ifitanye n’ingabo za Israel ndetse na guverinoma yayo.
Abirukanywe ni Nisreen Jaradat na Julius Shan, nk’uko byatangajwe na Hossam Nasr, umwe mu bategura ibikorwa byiswe No Azure for Apartheid. Nasr yavuze ko abo bakozi bakuwe mu kazi nyuma yo kwifatanya n’abandi mu gikorwa cy’iyigaragambyo cyari kigamije kwamagana uburyo Microsoft ikorana n’igisirikare cya Israel.
Iyi myigaragambyo yabereye ku cyicaro gikuru cya Microsoft, aho bamwe mu bakozi bashinze amahema (encampments) imbere mu kigo. Hari abandi bakozi babiri bari bamaze kwirukanwa mbere, bazira kwinjira mu biro by’umuyobozi mukuru wa Microsoft, Brad Smith, bakabicamo amashusho bayohereza kuri interineti mu buryo bwa live streaming.
Jaradat, umwe mu birukanywe, yari aherutse kwandika ubutumwa bwoherejwe kuri benshi mu bakozi ba Microsoft, aho yagaragaje ko ananiwe kwihanganira uburyo kompanyi imufata nk’umukozi ukomoka muri Palesitina. Yongeyeho ko atigeze yubahiriza amabwiriza y’imbere mu kigo abuza gukoresha amagambo yerekeye Palesitina na Gaza, kugira ngo abashe gusakaza ubutumwa bwe.
Ibi byabaye mu gihe umwuka w’amakimbirane hagati ya bamwe mu bakozi n’ubuyobozi wa Microsoft ukomeje kwiyongera, cyane cyane ku bijyanye n’imikoranire ikomeje hagati ya kompanyi n’igisirikare cya Israel, imikoranire bamwe bavuga ko yirengagiza uburenganzira bwa muntu mu karere ka Gaza.
