Papa Fransisko ntakiri gukoresha ibikoresho bimwongerera umwuka nijoro, kandi abaganga be bizera ko azakomeza gukira, nk’uko bivugwa na Vatican.
Mu itangazo ryatanzwe ku wa Gatatu, Vatican yavuze ko ubuzima bwa Papa bugenda burushaho kuba bwiza nyuma yo kumara amezi arenga abiri mu bitaro.
Papa Fransisko, ufite imyaka 88, yari arimo gukoresha uburyo bwo guhumeka budasaba kubagwa (noninvasive mechanical ventilation) nijoro, ubwo yari arwariye mu bitaro bya Gemelli i Roma, mu Butaliyani, azira indwara y’ubuhumekero ikomeye.
Itangazo ryakomeje rivuga ko ubwo buryo bwo guhumeka bwari “bwahagaritswe,” ariko Papa agikomeza guhabwa umwuka binyuze ku gace gato ka plastike gashyirwa munsi y’amazuru.
Ibiro bishinzwe itangazamakuru muri Vatican byongeyeho ko abaganga ba Papa bizera ko uburwayi bwe bugenzurwa neza.
Bavuze kandi ko nta bushyuhe afite, ndetse ibisubizo by’ibizamini bye by’amaraso biri ku rwego rusanzwe. Aya makuru mashya aje nyuma y’uko Vatican yari yatangaje ku wa Mbere ko Papa yari amaze igihe gito ahumeka atifashishije imashini.
Ku wa Kabiri, Umwami Charles wa III w’u Bwongereza yatangaje ko we n’umugore we, Umwamikazi Camilla, bazasura u Butaliyani na Vatican mu ntangiriro za Mata.
Uyu mwami n’umugore we bateganyijwe guhura na Papa Fransisko ku itariki ya 8 Mata, muri gahunda isanzwe itegurwa ku bufatanye bw’abayobozi bakuru ba Vatican.
Papa Fransisko yajyanywe mu bitaro ku itariki ya 14 Gashyantare nyuma yo kurwara umusonga mu bihaha byombi.
Mu gihe yari mu bitaro, Papa yagiye ahabwa uburyo bwo kwitabwaho bugamije gufasha guhumeka neza hamwe n’ubundi bufasha bugenewe gukemura ibibazo by’amavi n’inyuma.
Ku cyumweru, Vatican yasohoye ifoto ya mbere ya Papa ari mu bitaro, igaragaza ari gusenga muri chapelle.
Papa Fransisko akunze kugira uburwayi bw’ubuhumekero kubera ko yigeze kugira pleurisy (indwara yo mu gatuza) maze agakurwamo igice cy’uruhaha rumwe akiri muto.
