Ku wa 27 Werurwe 2025, Perezida w’u Burusiya, Vladimir Putin, yagiranye ikiganiro n’abasirikare b’igihugu cye bakoresha ubwato butwara intwaro za nikleyeri bwitiriwe Arkhangelsk. Muri iki kiganiro, Putin yagaragaje ko ingabo z’u Burusiya zifite imbaraga ziruta iz’iza Ukraine ku mpande zose. Yavuze ko u Burusiya bugiye kurushaho gukanda Ukraine kandi ko igihe cyo kubona ibisubizo kigeze.
Putin yasobanuye ko intego y’igihugu cye ari ukugera ku bwumvikane butuma amakimbirane na Ukraine arangira binyuze mu nzira y’amahoro. Yongeye gushimangira ko kugira ngo u Burusiya bwumve ko bufite umutekano, ibihugu by’iburengerazuba, by’umwihariko NATO, bigomba gukura ibikorwa byabyo muri Ukraine. Iki ni kimwe mu by’ingenzi u Burusiya busaba kugira ngo haboneke umuti urambye w’intambara imaze imyaka irenga itatu.
Ibihugu by’i Burayi byakomeje gukangurira Ukraine gukomeza intambara, aho Putin yavuze ko bamwe mu bayobozi b’ibihugu by’iburengerazuba, barimo uwahoze ari Minisitiri w’Intebe w’u Bwongereza Boris Johnson, batesheje agaciro imbaraga z’igisirikare cy’u Burusiya. Yibasiye Boris avuga ko yaba yaribagiwe ubushobozi bw’ingabo z’u Burusiya n’intwaro nk’ubwato bwa Arkhangelsk, cyangwa se atari asobanukiwe n’imbaraga z’igisirikare cy’icyo gihugu.
Ku wa 18 Werurwe 2025, nyuma y’ubwumvikane bwabaye hagati ya Putin na Donald Trump, u Burusiya bwatangaje ko bugiye guhagarika ibitero ku bikorwaremezo by’ingufu bya Ukraine. Nyamara, u Burusiya buvuga ko Ukraine yakomeje kurenga kuri ako gahenge, igaba ibitero ku bikorwaremezo by’u Burusiya, cyane cyane mu ntara ya Kursk.
Ibi biganiro n’ibikorwa byombi bigaragaza ko intambara hagati y’u Burusiya na Ukraine ikomeje kugira ingaruka zikomeye, ndetse n’umwuka w’ubushyamirane ukomeza kwiyongera. Nubwo hari ibiganiro by’amahoro bikomeje hagati ya Amerika, Ukraine, n’u Burusiya, haracyari impungenge ku cyemezo cyafatwa ku kibazo cya Ukraine na NATO.
