Ku wa Gatandatu, tariki ya 11 Mutarama 2025, kuri Stade ya Huye, habaye umukino ukomeye w’umunsi wa 15 wa shampiyona y’u Rwanda. Mukura Victory Sports yakiriye Rayon Sports, maze umukino urangira Mukura itsinze ibitego 2-1, bityo igahagarika agahigo ka Rayon Sports ko kudatsindwa mu mikino yari imaze gukina muri shampiyona.
Mukura yatangiye umukino neza, yerekana imbaraga zayo n’umuvuduko mwinshi. Ku munota wa 39, Jordan Dimbumba yafunguye amazamu nyuma yo kubyaza umusaruro kwibeshya kw’abakina inyuma ba Rayon Sports. Ntibyagarukiye aho kuko ku munota wa 42, Niyonizeye Fred yatsinze igitego cya kabiri cya Mukura, bituma igice cya mbere kirangira ari ibitego 2-0.
Mu gice cya kabiri, Rayon Sports yakoze impinduka zirimo kwinjiza abakinnyi bashya nka Niyonzima Olivier Sefu, Muhire Kevin na Aziz Bassane, ishaka uburyo bwo gusubira mu mukino. Ku munota wa 52, Rayon yabonye penaliti nyuma y’ikosa ryakorewe kuri Aziz Bassane, maze Fall Ngagne ayinjiza neza, igitego cya mbere cya Rayon Sports.
Nubwo Rayon Sports yakomeje gushakisha igitego cyo kwishyura, Mukura Victory Sports yagaragaje ubwirinzi bukomeye ndetse inarwana no gukoresha neza iminota y’umukino isigaye. Iminota 90 y’umukino yarangiye Mukura itsinze ibitego 2-1.
Iyi ntsinzi yatumye Mukura Victory Sports izamuka ku mwanya wa karindwi n’amanota 21, mu gihe Rayon Sports ikomeje kuyobora urutonde rwa shampiyona n’amanota 36 mu mikino 15. Icyakora, iyi ntsinzi ya Mukura yahaye ibyishimo bikomeye abafana bayo ndetse ishyira iherezo ku rugendo rwa Rayon Sports rwo kudatsindwa.
