Ibibazo by’ubucuruzi hagati ya Leta Zunze Ubumwe za Amerika n’ibindi bihugu bikomeye ku isi byakomeje gufata indi ntera, nyuma y’uko Perezida Donald Trump atangaje umusoro wa 25% ku modoka n’ibice byazo bitumizwa hanze. Iki cyemezo cyahise gikurura amagambo akomeye aturutse ku bihugu byibasiwe n’iyo misoro, by’umwihariko ibyo ku mugabane w’u Burayi, Canada, n’Ubushinwa.
U Budage bwavuze ko butazemera gushyirwaho igitutu, ndetse busaba u Burayi kwihagararaho no gufata ingamba zikomeye zo kwihorera. Perezida w’u Bufaransa na we yamaganye iki cyemezo, avuga ko nta shingiro gifite kandi ko ari guta igihe. Canada yacyise igitero cyeruye ku bukungu bwayo, mu gihe Ubushinwa nabwo bwashinje Amerika kurenga ku mategeko mpuzamahanga agenga ubucuruzi.
Izi mpuha za politiki n’ubukungu zabayeho zatangiye kugira ingaruka ku masoko y’imari. Ibigo bikomeye bikora imodoka, byaba ibyo mu Buyapani no mu Budage, byatakaje agaciro ku isoko ry’imari. Muri Amerika, General Motors yagabanutseho 7%, mu gihe Ford yaguye hejuru ya 2%, bikerekana uburyo iki cyemezo cyahungabanyije icyizere cy’abashoramari.
Trump yagaragaje ko niba u Burayi bwafatanya na Canada mu gukora ibyo yita “kwangiza ubukungu” bw’Amerika, azashyiraho imisoro ikakaye kurushaho. Ibi bishobora gutuma intambara y’ubucuruzi ikomera, bigatuma imishinga y’ubucuruzi hagati y’ibi bihugu ihungabana.
Iki cyemezo cyakomeje kugaragaza uburyo Amerika iri gukomeza gushyira igitutu ku bafatanyabikorwa bayo b’ubucuruzi, mu rwego rwo kurengera ubukungu bwayo. Ariko na none, ibi bishobora kugira ingaruka mbi ku bukungu bw’isi muri rusange, cyane cyane ku bigo bikora imodoka ndetse n’abaguzi bo hirya no hino ku isi.
Mu gihe ibihugu bikomeje gutanga ibisubizo bikaze ku cyemezo cya Trump, haribazwa niba aya makimbirane y’ubucuruzi azashira binyuze mu biganiro, cyangwa niba azabyara intambara y’ubucuruzi ifite ingaruka mbi ku bukungu bw’isi.
