Kuva kuri iki Cyumweru tariki ya 21 kuzageza tariki ya 28 Nzeri 2025 Kigali mu rw’imisozi igihumbi hagiye kubera shampiyona y’Isi y’Amagare ya 2025.
U Rwanda rugiye kwandika amateka kuko shampiyona y’Isi y’Amagare ni ubwa mbere igiye kubera ku mugabane wa Afurika. U Rwanda rwahawe kwakira iri rushanwa muri 2021 aho rwari ruhanganye na Morocco.
Mu mwaka wa 2019 ni bwo rwari rwatanze kandidatire yo kwakira iri rushanwa nyuma y’uko Ishyirahamwe ry’umukino w’amagare ku Isi ryari ryasabye ko ibihugu bya Afurika bisaba.
Ni shampiyona ubusanzwe ikunda kubera ku mugabane w’i Burayi, aho mu nshuro 98 imaze kuba, inshuro 11 ari zo zonyine yabereye hanze y’uyu mugabane. Iya 2021 yabereye mu Bubiligi, iya 2022 ibera mu mujyi wa Wollongong muri Australia, 2023 ibera Glasgow muri Ecosse, naho iya 2024 ikaba yarabereye i Zürich mu Busuwisi.
Shampiyona y’Isi y’Amagare ya 2025 igiye kubera i Kigali yitabiriwe abakinnyi 918 baturutse mu bihugu 110.
Kuri iki Cyumweru harabaho ibizwi nka “Time Trial” aho umukinnyi arajya ahagukuruka wenyine agasiganwa n’ibihe.
Abasiganwa barahaguruka BK Arena aho ari naho harabera ibirori byo gufungura Shampiyona y’Isi.
