Mu ntangiriro za Werurwe 2025, Leta Zunze Ubumwe za Amerika zahagaritse inkunga ya gisirikare ku gihugu cya Ukraine nyuma y’uko Kyiv yatangaje ko yiteguye gusinyana amasezerano y’agahenge n’u Burusiya mu gihe cy’iminsi 30. Iyi ngingo yatumye habaho kutumvikana hagati y’abayobozi ba Ukraine na Amerika, cyane cyane nyuma y’uko Perezida wa Leta Zunze Ubumwe za Amerika, Donald Trump, yashinjaga Perezida wa Ukraine, Volodymyr Zelensky, kuba indashima no gufata ibyemezo bishobora guteza intambara ku isi hose.
Ku itariki ya 18 Werurwe 2025, Umuvugizi wa Minisiteri y’Ingabo ya Amerika, Sean Parnell, yatangaje ko inkunga ya gisirikare ndetse no gusangira amakuru y’ubutasi hagati ya Amerika na Ukraine byasubukuwe. Mbere y’aho, Amerika yari yahagaritse inkunga ya gisirikare n’ubufatanye mu by’ubutasi kubera impaka z’abayobozi bakuru ba Amerika n’abayobozi ba Ukraine.
Iyi ngingo yaje nyuma y’ikiganiro gikomeye hagati ya Perezida Donald Trump na Perezida w’u Burusiya, Vladimir Putin. Abakuru b’ibi bihugu bombi bavuganye kuri telefoni mu kiganiro cyamaze amasaha abiri n’igice, baganira ku buryo bwakoroshya intambara hagati ya Ukraine n’u Burusiya. Iki kiganiro cyagize uruhare runini mu gushishikariza impande zombi gushyiraho amasezerano y’agahenge.
Mu gihe iki kiganiro cyagize ingaruka nziza, impande zombi bemeranyije gushyiraho agahenge k’iminsi 30, aho bemeranyije ko hatagomba gukomeza kugabwa ibitero ku bikorwaremezo by’ingufu. Banaganiriye ku buryo imirwano yakongera guhagarara burundu. Inkunga ya gisirikare ya Amerika ku Ukraine yongeye gusubukurwa nyuma y’iki kiganiro, bigaragaza impinduka mu myumvire ya Amerika nyuma y’uko yari yahagaritse ubufasha bwa gisirikare.
