Tehran, Iran – Ku wa 22 Kamena 2025 – Iran, ibinyujije mu Rwego rw’Igihugu Rushinzwe Ingufu za Nuclear (Atomic Energy Organization of Iran – AEOI), yatangaje ko ibigo bikomeye bikora ubushakashatsi n’iterambere mu bijyanye na nuclear byagabweho ibitero. Nubwo hari ibyangiritse, Iran yashimangiye ko iterambere ry’inganda za nuclear rizakomeza.
Ibitero bivugwa byagabwe mu rwego rwo gucogoza ubushobozi bwa Iran mu gukora no gutunganya uranium. Aho byibasiwe cyane ni ku bigo nka Fordow, Natanz, na Isfahan, bizwiho gukora ubushakashatsi buhambaye mu bijyanye n’iterambere rya nuclear.
Ibitangazamakuru mpuzamahanga nka Associated Press na The Guardian byatangaje ko indege za gisirikare za Leta Zunze Ubumwe za Amerika (USA) na Israel zaba zaragize uruhare muri ibi bitero, bikozwe hakoreshejwe ibisasu byihariye bizwi nka bunker busters.
Mu itangazo ryasohowe na AEOI, hagaragayemo amagambo akomeye: “Ibi bitero ntibizadukoma mu nkokora. Iran izakomeza guteza imbere uburenganzira bwayo bwo kugira ingufu za nuclear ku nyungu z’amahoro n’iterambere.”
AEOI yagaragaje ko ibi bitero binyuranyije n’amategeko mpuzamahanga, isaba ko amahanga atazaceceka ku bikorwa by’intambara byibasira ibikorwa bigamije iterambere ry’ubumenyi.
Nubwo hari ibyangiritse ku bigo byibasiwe, Ishami ry’Umuryango w’Abibumbye rishinzwe kugenzura ingufu za nuclear (IAEA) ryatangaje ko nta myuka y’ubumara (radiation) yagaragaye hanze y’ibigo byatewe, bityo nta ngaruka zihutirwa ku baturage zatangajwe.
Ibi bikomeje gutanga icyizere ko n’ubwo hari ibyangiritse, hakomeje gukurikizwa ingamba zikomeye zo kurinda abaturage n’ibidukikije.
Israel ivuga ko ibyo bitero byagabanyije ubushobozi bwa Iran mu gutunganya uranium, mu gihe Iran yo ibifata nk’igikorwa kigamije kuyibuza uburenganzira bwayo nk’igihugu kigenga.
Ibihugu by’igihangange nk’u Bushinwa, Uburusiya, hamwe n’ibihugu bya E3 (Ubufaransa, Ubudage, n’u Bwongereza) byasabye impande zombi guhagarika ibikorwa by’intambara no gusubira ku meza y’ibiganiro.
Iran ikomeje kugaragaza ko itazacika intege ku cyerekezo cyo guteza imbere ingufu za nuclear ku nyungu z’amahoro, kabone n’ubwo ibigo byayo bikomeje kuba intandaro y’imvururu mpuzamahanga. Uburyo aya makimbirane azakemukamo bushobora kugena icyerekezo cy’umutekano n’iterambere mu karere ka Middle East, no ku rwego mpuzamahanga.
