Perezida wa Kenya, William Ruto, yatangaje ko igihugu cye cyashoye miliyoni 500 z’Amashilingi ya Kenya (arenga miliyari 5 Frw) mu rugamba rwo kwakira ibirori bya mbere bya Grammy Awards Africa. Intego nyamukuru ni uguteza imbere ubuhanzi, guteza imbere ubukungu bushingiye ku muco, no guhindura Kenya igicumbi cy’imyidagaduro muri Afurika no ku rwego mpuzamahanga.
Iyi gahunda yatewe inkunga n’uruzinduko rwa Perezida Ruto muri Hollywood mu 2023, aho yakirijwe na Tyler Perry, ashimangira umubano n’uruganda rwa sinema n’umuziki wa Amerika. Nubwo Kenya yiyemeje gushaka aya mahirwe, u Rwanda narwo rwagiye ruvugwa ko rushobora kwakira ibi birori mu 2025 nyuma yo gusinyana amasezerano n’Urwego rw’Igihugu rw’Iterambere (RDB).
Abayobozi ba Recording Academy bakoreye ingendo mu Rwanda, basura BK Arena no kuganira n’abayobozi b’inzego zifite aho zihuriye n’umuco n’imyidagaduro. Nubwo nta gihe ntakuka cyatangajwe, ibi birori byitezweho guteza imbere abahanzi ba Afurika no kuzamura isura y’uyu mugabane ku rwego mpuzamahanga.
