Minembwe – Ku wa 1 Nyakanga 2025 Umutwe wa politiki n’impinduramatwara MRDP-Twirwaneho (Mouvement Républicain pour la Dignité du Peuple) watangaje impinduka zikomeye mu buyobozi bukuru bwayo, aho Prof. Freddy Rukema Kaniki yatorewe kuba Perezida w’Umutwe, ahabwa inshingano zo kuyobora urugamba rwo guharanira uburenganzira, ubumwe n’icyubahiro cy’Abanye Congo.
Ibi byatangajwe mu Itangazo rusange nomero 001 yasohowe ku mugaragaro n’umuvugizi w’umutwe Kamasa Ndakize Welcome, itangazo ryasinyiwe i Minembwe nyuma y’isesengura ryakozwe n’Inama y’Abanyabwenge, rikemezwa nk’intego yihutirwa.
Abayobozi Bashya Bemejwe:
1. Perezida:
- Prof. Freddy Rukema Kaniki: Umwarimu, impuguke mu miyoborere, yahawe kuyobora umutwe mu guharanira impinduka za politiki, uburenganzira bwa muntu no kurwanya ivangura rikorerwa bamwe mu baturage bo muri Kivu y’Amajyepfo.
2. Visi Perezida wa mbere:
- General Charles Sematama: Yagizwe Umugaba Mukuru w’Ingabo (Chef d’État-Major), ashinzwe ibikorwa byose bya gisirikare n’umutekano. Uyu musirikare azaba umusingi w’icengezamatwara rya gisirikare rishingiye ku kubungabunga abaturage.
3. Visi Perezida wa kabiri:
- Bwana Alexis N. Mugisha: Ashinzwe imiyoborere ya politiki, imikoranire ya dipolomasi n’inzego z’ubutegetsi. Azaba umuhuza wa MRDP-Twirwaneho n’ibindi bigo n’imiryango mpuzamahanga.
4. Umunyamabanga Mukuru:
- Madame Adèle Kibasumba: Niwe mushya ushinzwe imicungire rusange y’ibikorwa n’imiyoborere ya buri munsi y’umutwe.
MRDP-Twirwaneho yagaragaje ko izi mpinduka zishingiye ku mahame ashyira imbere ubumwe, kurandura akarengane, no gusigasira agaciro k’abaturage b’Abanye Congo. Binyuze mu butumwa bwatanzwe, umutwe wemeje ko uzakomeza gushyira imbere uburenganzira bwa muntu, demokarasi isesuye, ndetse n’uburenganzira bw’abaturage bo mu bice byagiye byibasirwa n’ivangura n’inzangano zishingiye ku moko.
