Peter Reynolds, Umwongereza w’imyaka 79, yafunzwe n’Abatalibani muri Afghanistan kuva mu ntangiriro z’ukwezi kwa Gashyantare. Yatangaje ko afungiye muri gereza ya Pul-e-Charkhi i Kabul, aho avuga ko abayeho mu buzima bubi cyane, yagereranyije n’”umuriro w’iherezo”.
Mu kiganiro kuri telefone cyafashwe muri gereza, Peter yavuze ko afite impungenge zikomeye ku mutekano w’umugore we, Barbie Reynolds, nawe wafunzwe ariko akabitswe mu gice kigenewe abagore. Yagize ati: “Mfashwe mpambiriwe n’abicanyi n’abasambanyanyi, harimo n’umugabo wishe umugore n’abana be batatu. Hari abasa n’abafashwe n’abadayimoni.”
Peter yavuze ko aho afungiye haba nko muri “kage” aho kuba muri “selire”, ariko ko byibura afashwe neza ugereranyije n’uko umugore we afashwe. Yavuze ko arya rimwe ku munsi kandi yaratakaje ibiro byinshi.
Peter n’umugore we bamaze imyaka 18 bakora imishinga y’uburezi mu mashuri muri Afghanistan. Bafashe icyemezo cyo kuguma mu gihugu nyuma y’uko Abatalibani bafashe ubutegetsi mu 2021. Bafashwe mu kwezi kwa Gashyantare ubwo basubiraga mu rugo rwabo mu ntara ya Bamiyan, bakoresheje indege ntoya bari bakodesheje ku nshuti yabo y’Umunyamerika ufite inkomoko mu Bushinwa, Faye Hall.
Faye Hall nawe yafashwe ariko arekurwa nyuma y’uko Leta ya Trump ikuyeho ibihembo bya miliyoni 10 z’amadolari byari byarashyizwe ku mitwe y’abayobozi bakuru b’Abatalibani barimo Minisitiri w’Ubutegetsi bw’Igihugu, Sirajuddin Haqqani.
Peter yavuze ko ubwo bafatwaga, babwiwe ko impamvu ari uko indege yabo itari ifite uruhushya rwo kugwa, ko bari burekurwe vuba. Ariko ibyo ntibyabaye, ahubwo bahise bamburwa telefoni, bajyanwa ku biro bya minisitiri i Kabul, batandukanywa, hanyuma bajyanwa muri gereza ya Pul-e-Charkhi.
Abatalibani babwiye Peter ko bamusanganye ibitabo 59 bivugwaho ko bidahuye n’imyemerere ya Islam. Yababajije icyo ibitabo bikubiyemo kibangamiye Islam, ariko ntawe washoboye kubimusobanurira. Yavuze ko bamaze gucukumbura abantu barenga 30 bakoranye, barimo n’abakozi bo mu by’imisoro n’ibaruramari, kandi ko iperereza ryabo ntacyo ryagaragaje nk’icyaha. Yongeraho ko hari raporo y’Urwego rw’Ubugenzacyaha y’amapaji 9 yashyizweho igikumwe, ariko n’ubu ntibararekurwa.
Peter yavuze ko ibyo Abatalibani bakoze ari igisebo gikomeye, kandi ko bakwiye kwemera amakosa yabo. Yarasoje agira ati: “Ibi ni akarengane kagaragara. Abatalibani bakoze amakosa kandi bakwiye kubihagararaho.
