Abantu benshi bakunze kwitiranya ububabare bw’impyiko n’ubw’umugongo, kuko byose byiyumvikanira mu gice cy’inyuma cy’umubiri. Ibi bituma hari abatinya cyangwa bakirengagiza ikibazo, bakibwira ko ari ububabare busanzwe bw’umugongo kandi ari ikibazo gikomeye cy’impyiko. Ni yo mpamvu kumenya neza itandukaniro ry’ibi bibazo ari ingenzi cyane, kuko bifasha gufata ingamba zikwiriye zo kwivuza no kwirinda.
Impyiko ziherereye mu mugongo, ariko si mu gice cyo hasi cyane nk’uko benshi babitekereza. Ziherereye hejuru gato, hafi y’imbavu, ku mpande zombi z’umugongo. Iyo umuntu arwaye impyiko, ububabare bukunda kuba ku ruhande rumwe cyangwa zombi, kandi bukaba buhoraho, budahindagurika cyane n’uko wicaye cyangwa uhagaze. Akenshi bushobora no gukwira bukagera mu nda imbere cyangwa ku ruhande rw’amatako.
Ku rundi ruhande, ububabare bw’umugongo bwo bukunze kuba mu gice cyo hasi (mu rukenyerero), kandi bukagira aho buhuriye cyane n’imyitwarire y’umubiri. Bushobora kongerwa no kwicara igihe kirekire, guhagarara nabi, cyangwa guterura ibintu mu buryo butari bwo. Ubu bubabare bushobora kugabanuka iyo uruhutse cyangwa uhinduye uko uhagaze.
Ububabare bw’impyiko bushobora guterwa n’impamvu zitandukanye zirimo:Kwandura mu mpyiko ,Amabuye mu mpyiko ,Kubura amazi mu mubiri.Ibi bibazo bituma impyiko zidakora neza, bigatera ububabare bukomeye bushobora no gutuma umuntu atabasha gukora imirimo ye ya buri munsi.
Ububabare bw’umugongo bwo akenshi buturuka ku mitsi yananiwe cyangwa yakomeretse,imyanya y’amagufwa yangiritse,kwicara nabi igihe kirekire,imyitozo cyangwa imirimo irenze ubushobozi bw’umubiri.
Ibimenyetso bijyana n’ubu bubabare,ububabare bw’impyiko akenshi buzanwa n’ibindi bimenyetso by’ingenzi cyane birimo Umuriro n’ubushyuhe bwinshi mu mubiri ,Isesemi cyangwa kuruka,ukababara mu gihe cyo kwihagarika ,inkari zifite ibara ridasanzwe cyangwa zifite impumuro idasanzwe,Kujya mu musarani kenshi cyangwa kumva ushaka kwihagarika kenshi.Ibi bimenyetso bigaragaza ko ikibazo gishobora kuba gikomeye, kandi gisaba ubuvuzi bwihuse.
Ku rundi ruhande, ububabare bw’umugongo bwo akenshi ntibujyana n’ibi bimenyetso. Ahubwo bushobora kugaragaramo Kunanirwa kwicara cyangwa guhagarara igihe kirekire,kubabara iyo wimutse cyangwa ugerageje kunama,gufata mu mugongo cyangwa kumva imitsi ikomanye.
Uburyo bwo kubitandukanya mu buzima bwa buri munsi.Hari ibintu byoroshye umuntu yakwitaho kugirango amenye aho ikibazo gishobora kuba kiri. Niba ububabare budahinduka n’uko uhagaze cyangwa wicaye, kandi bukaba bujyanye n’ibimenyetso nk’umuriro cyangwa ibibazo by’inkari, bishobora kuba ari impyiko. Ariko niba ububabare bugenda bugabanuka iyo uruhutse cyangwa ugahindura uko wicaye, akenshi biba ari ikibazo cy’umugongo.Icyo wakora igihe uhuye n’iki kibazo,ni ingenzi cyane kutitiranya ikibazo cyangwa gufata imiti uko wishakiye.
Iyo ububabare bumaze igihe cyangwa bukabije, ugomba kugana ivuriro ukisuzumisha. Abaganga bashobora kugufasha kumenya neza ikibazo ukoresheje ibizamini bitandukanye, hanyuma bagatanga umuti uboneye.
Hari kandi ingamba zo kwirinda ushobora gukurikiza nko kunywa amazi ahagije buri munsi,kwicara no guhagarara mu buryo bwiza,Kwirinda guterura ibintu biremereye nabi.Gukora imyitozo ngororamubiri ifasha umubiri gukomera,kwivuza hakiri kare igihe ubonye ibimenyetso bidasanzwe
Ububabare bw’impyiko n’ubw’umugongo bushobora gusa, ariko buratandukanye cyane mu mpamvu no mu bimenyetso. Kumenya iri tandukaniro bifasha umuntu gufata icyemezo gikwiye ku buzima bwe. Ntugakomeze kwihanganira ububabare udasobanukiwe inkomoko yabwo; gushaka ubufasha bw’abaganga hakiri kare ni bwo buryo bwiza bwo kurinda ubuzima bwawe no kwirinda ingaruka zikomeye zishobora kuvuka
